1. Historia Mjekësore Familjare

Rreth 5- 10% e kancereve të gjirit mendohet të jenë të trashëguar nga një familjar si pasojë e  një defekti gjenetik. Shkaku më i shpeshtë hereditar apo i trashëguar është një mutacion në gjenet BRCA1 dhe BRCA2. Në qelizat normale këto gjene parandalojnë kancerin duke ndihmuar në prodhimin e proteinave specifike që ndihmojnë qelizat të mos rriten në mënyre anormale.

Në disa familje me mutacione BRCA risku i hasjes së kancerit të gjirit mund të jetë deri në 80%. Këto kancere priren të zhvillohen në gratë e reja dhe shpesh mund të prekin të dy gjinjtë. Gratë me këtë defekt kanë prirje të zhvillojnë edhe kancere të tjera sidomos kancer të ovareve.

Ka edhe defekte në gjene të tjera të identifikuara si të lidhura me kancerin e gjirit, por janë shumë më të rralla dhe nuk e rrisin riskun aq shumë sa të mësipërmit (ATM, p53, CHEK2, PTEN, CDH1)

Ende nuk ka rekomandime përfundimtare mbi vlerën e testimit gjenetik me qëllim kapjen e hershme të këtyre defekteve dhe monitorimin përkatës të grave ku ato hasen.

Historia familjare për kancer gjiri

Gratë që kanë të afërm të afërt me kancer gjiri kanë një risk më të lartë se popullata e përgjithshme. Risku i gruas pothuaj dyfishohet në rastet kur nëna apo motra ka pasur kancer gjiri. Risku trefishohet kur ka pasur dy raste te tilla në familjarët e afërt. Megjithatë, vetëm më pak se 15% e grave me kancer gjiri kanë raportuar në anamnezë një të afërm me kancer gjiri. Më shumë se 85% nuk kanë asnjë të tillë.

Historia personale lidhur me kancerin e gjirit

Një grua me kancer në njërin gji ka një risk 3-4 herë më të lartë për të zhvilluar një kancer të ri në gjirin tjeter apo në një pjesë tjetër të të njëjtit gji. Kjo është e ndryshme nga rishfaqja e kancerit të parë.