Marrëveshje bashkëpunimi me Universitetin e Peruxhias, Itali

Ministri Beqaj Nënshkruan Marrëveshje Afatgjatë Bashkëpunimi Shkencor me Universitetin Shtetëror të Studimeve të Peruxhias

Tiranë, 19/12/2013 – Në kuadrin e vizitës së punës në Itali me ftesë të Rajonit të Umbrias dhe Universitetit Shtetëror të Peruxhias (Università degli Studi di Perugia), Ministri i Shëndetësisë, z. Ilir Beqaj, i shoqëruar nga Zv.Ministri i Shëndetësisë, z. Klodian Rjepaj, u takua dje në Peruxhia (18/12/2013) me një grup përfaqësuesish të këshillit drejtues akademik të këtij institucioni, të kryesuar nga Rektori i Universitetit, Prof. Franco Moriconi.

Në takimin e zhvilluar në Rektoratin e Universitetit Shtetëror të Peruxhias, Ministri Beqaj, i njohu bashkëbiseduesit italianë me prioritetet e Ministrisë së Shëndetësisë në përmbushje të objektivave të programit qeverisës, duke theksuar rëndësinë që ka përmirësimi dhe fuqizimi i mëtejshëm i bashkëpunimit të ndërsjelltë shkencor në sektorin e shëndetësisë dhe më gjerë.

Duke shprehur kënaqësinë për vizitën e z. Beqaj, Prof. Moriconi, në kuadrin e projekteve të ndërkombëtarizimit të Umbrias dhe institucioneve akademike në këtë rajon, u shpreh i gatshëm për të marrë në konsideratë nisma dhe propozime konkrete nga ministria shqiptare e shëndetësisë që do të ndihmonin në modernizimin dhe zhvillimin e bashkëpunimit me përfitime të ndërsjellta.

Në këtë kuadër, Ministri Beqaj dhe Prof. Moriconi nënshkruan një marrëveshje shkencore bashkëpunimi, e cila parashikon përforcimin dhe promovimin e bashkëpunimit në fushën e kërkimeve shkencore dhe shkëmbimin e ndërsjelltë të know-how-t. Fushat kryesore shkencore të bashkëpunimit ku do të përqëndrohet ky bashkëpunim përfshijnë, ndërmjet të tjerash, logjistikën në fushën e strukturave spitalore, shërbime të inxhinierisë klinike dhe procedurave mjekësore, etj.

Bashkëpunimi synon promovimin e angazhimit të docentëve, kërkuesve dhe studentëve, shkëmbime të ndërsjellta të botimeve didaktike dhe shkencore, organizimin e seminareve dhe koventave, si dhe zhvillimin e aktiviteteve didaktike të përbashkëta. Koordinatorët shkencorë për të dy institucionet do të jenë Prof. Gianni Bidini (Università degli Studi di Perugia) dhe z. Ilir Beqaj, Ministër i Shëndetësisë. Marrëveshja do të zgjasë tre vjet dhe është e rinovueshme.

Gjithashtu, një ditë më parë, (17/12/2013) Ministri Beqaj zhvilloi një takim edhe me përfaqësues të këshillit akademik të Universitetit të Peruxhias për të Huajt (Università per Stranieri di Perugia), të kryesuar nga Prof. Giovanni Paciullo, si dhe përfaqsues të Rajonit të Umbrias, ku u diskutuan gjithashtu mundësitë për projekte të përbashkëta bashkëpunimi në fushën e shkëmbimit të ndërsjelltë akademik dhe profesional në sektorin e shëndetësisë.

—###–