Realizohen për herë të parë implantet kokleare falas në QSUT

Realizohen për herë të parë implantet kokleare falas në QSUT

Tre fëmijë janë pacientë e parë që kanë përfituar nga kjo ndërhyrje

-Prof. Boçi: Ndërhyrje që ndihmojnë fëmijët me humbje të thella të dëgjimi

Drejtore Manastirliu: Realizuam një nga objektivat e 2017-ës

Tiranë, 21/02/2017 – Qendra Spitalore Universitare “Nënë Tereza” në Tiranë vijon të rrisë gamën e shërbimeve të ofruara për t’ju ardhur në ndihmë pacientëve në nevojë. Për herë të parë, në këtë Qendër Spitalore, në Shërbimin e ORL-së (Oto-Rhino-Laringologjisë), u bë i mundur realizimi me sukes i ndërhyrjeve të para kirurgjikale për vendosjen e implantit koklear te fëmijët me probleme të thella dëgjimi.

Implanti koklear, e cila është një pajisje e kompjuterizuar që mund të rivendosë dëgjimin e dobishëm për personat me humbje të rënda ose të thella të dëgjimit (shurdhim nervor), implantohet në fëmijët që kanë shurdhësi të thellë dhe nuk përfitojnë më nga asnjë ndihmesë tjetër dëgjimi. Të tre fëmijët ku është realizuar kjo ndërhyrje deri më tani, janë në një gjendje shumë të mirë.

Shef i Shërbimit të ORL-së në QSU “Nënë Tereza”, profesor Besim Boçi, shprehet se për herë të parë në këtë shërbim është kryer me sukses ndërhyrja për vendosjen e implantit koklear në tre fëmijë, teksa shpreh falënderimin për mbështetjen e Ministrisë së Shëndetësisë për këtë program.

“Implanti koklear është një ndërhyrje që indikohet në fëmijët me shurdhësi të thellë dhe që nuk përfitojnë me asnjë ndihmesë tjetër dëgjimi, proteza akustike le të themi. Sigurisht që është një nga operacionet që kërkon infrastrukturën e duhur në sallën e operacionit dhe unë, meqë mu dha rasti, një falënderim të veçantë kam për Ministrin që na mbështeti në këtë iniciativë dhe për drejtoreshën e spitalit e cila na krijoji gjithë infrastrukturën e duhur që këto tre ndërhyrje të realizoheshin me sukses”, theksoi profesor Boçi, teksa shton, “një falënderim të veçantë unë kam për stafin që mori pjesë në ndërhyrjen kirurgjikale, veçanërisht kompania “MED-EL” i cili na siguroi gjithë asistencën teknike për kryerjen me sukses të këtyre ndërhyrjeve”.

Ndërkohë, drejtoresha e Qendrës Spitalore Universitare “Nënë Tereza”, zj. Ogerta Manastirliu shprehet se realizimi i ndërhyrjeve të tilla ka qenë një nga objektivat kryesorë të Shërbimit të ORL-së, i cili u realizua më sukses.

“Jemi shumë të kënaqur që arritëm që brenda 2017-ës, pra në muajt e parë, të plotësonim një ndër objektivat shumë të rëndësishëm që i kishim vënë vetes në shërbimin e ORL-së, për të kryer implantet e para kokleare. Falë mbështetjes së Fondacionit “Lichtenstein”, falë mbështetjes të kompanisë “MED-EL”, falë vizonit dhe përkushtimit të mjekëve të shërbimit të ORL-së, profesor Besim Boçit dhe gjithë ekipit të tij, falë mbështetjes së Profesor Trotiç, që nga Zagrebi ka ardhur pikërisht për të asistuar ekipin tonë për të realizuar këto ndërhyrje, ne sot kemi realizuar një ndër objektivat që kemi vendosur për të realizuar gjatë këtij viti dhe mbi të gjitha për të filluar dhe për ti hapur rrugën implanteve kokleare dhe kryerjes së tyre në QSUT”, theksoi zj. Manastirliu.

—###—

Fjala e plotë e Prof. Besim Boçi, shef i Shërbimit të ORL-së në QSUT:

Për herë të parë në Shërbimin e ORL-së në Qendrën Spitalore Universitare është kryer implant koklear në tre fëmijë, të cilët kanë qenë donacion i një Fondacioni në “Lichtenstein”, me ndërmjetësinë e kompanisë së implanteve kokleare “MED-EL”.

Implanti koklear është një ndërhyrje që indikohet në fëmijët me shurdhësi të thellë dhe që nuk përfitojnë më asnjë ndihmesë tjetër dëgjimi, proteza akustike, le të themi.

Sigurisht, që është një nga operacionet që kërkon infrastrukturën e duhur në sallën e operacionit dhe unë, meqë mu dha rasti, një falënderim të veçantë kam për Ministrin që na mbështeti në këtë iniciativë dhe për drejtoreshën e spitalit, e cila na krijoji gjithë infrastrukturën e duhur që këto tre ndërhyrje të realizoheshin me sukses.

Dje janë realizuar dy ndërhyrjet e para dhe fëmijët janë në gjendje shumë të mirë, janë në Shërbim, nuk kanë pas asnjë ndërlikim gjatë ndërhyrjes edhe sot pritet që të kryhet ndërhyrja e tretë.

Gjithashtu, një falënderim të veçantë unë kam për stafin që morri pjesë në ndërhyrjen kirurgjikale, veçanërisht kompania “MED-EL”, e cila na siguroi gjithë asistencën teknike për kryerjen me sukses të këtyre ndërhyrjeve.

Fjala e plotë e Drejtores së QSUT-së, znj. Ogerta Manastirliu:

Jemi shumë të kënaqur që arritëm që brenda 2017-ës, pra në muajt e parë, të plotësonim një ndër objektivat shumë të rëndësishëm që i kishim vënë vetes në shërbimin e ORL-së për të kryer implantet e para kokleare. Falë mbështetjes së Fondacionit “Lichtenstein”, falë mbështetjes të kompanisë “MED-EL”, falë vizonit dhe përkushtimit të mjekëve të shërbimit të ORL-së, profesor Besim Boçit dhe gjithë ekipit të tij, falë mbështetjes së Profesor Trotiç, që nga Zagrebi ka ardhur pikërisht për të asistuar ekipin tonë për të realizuar këto ndërhyrje, ne sot kemi realizuar një ndër objektivat që kemi vendosur për të realizuar gjatë këtij viti, dhe mbi të gjitha, për të filluar dhe për t’i hapur rrugën implanteve kokleare dhe kryerjes së tyre në QSUT, Qendrën Spitalore Universitare “Nënë Tereza” në shërbimin e ORL-së.

Padyshim, është në saj të punës dhe rakordimit të punës në ekip, mbështetjes së Ministrisë së Shëndetësisë dhe plotësimit të të gjithë standardeve që duhet në këto ndërhyrje, -të cilat janë ndërhyrje shumë delikate që për fat të mirë kanë shkuar shumë mirë,- pra janë të suksesshme dy rastet që janë realizuar dje dhe rasti që është realizuar në këto momente.

Shumë faleminderit, Qendra Spitalore Universitare është gjithmonë e para në realizimin e ndërhyrjeve të reja dhe ju uroj suksese gjithë ekipit për të vazhduar edhe më tej me zhvillime të tjera në fushën e shëndetësisë.

Faleminderit!

—###—