Tetë spirometrat e rinj, tjetër premtim i mbajtur për përmirësimin e standarteve të shërbimit spitalor

Tiranë, 18/02/2014 – Ministri i Shëndetësisë, z. Ilir Beqaj, vizitoi sot (18/2/2014) Spitalin Universitar “Shefqet Ndroqi”, me rastin e pajisjes së Kabinetit të ri të Spirometrisë së këtij insititucioni me 8 (tetë) spirometra të rinj, të cilat janë pajisje mjekësore që shërben për matjen e vëllimit të ajrit që shkëmbehet nga mushkëritë, ku, nëpërmjet realizimit të spirogramës mundësohet identifikimi i patologjive të ndryshme respiratore. Këto pajisje janë pjesë e një programi bashkëpunimi të ndërmarrë nga Ministria e Shëndetësisë për përmirësimin e kujdesit parësor dhe atij spitalor shëndetësor për diagnostikimin dhe trajtimin e sëmundjeve të mushkërive, i cili do të mundësojë instalimin e 60 spirometrave në të gjithë vendin brenda muajit mars.

“Në vijim të përpjekjeve për të përmirësuar kujdesin shëndetësor, edhe atë spitalor por edhe parësor, sot, ju e patë, vumë në punë një kabinet të ri të ekzaminimit të sëmundjeve të mushkërive”, – tha Ministri Beqaj duke theksuar se, “këto pajisje do të na ndihmojnë të bëjmë një diferencim ndërmjet sëmundjeve me shkallë të lartë infeksioni, nga të sëmurët e tjerë.”

“Ka qenë një kërkesë, që në fakt, Shoqata e Pneumologëve ma bëri në ditët e para të punës në një kongres të tyrin,” vazhdoi më tej ai, “sepse për fat konstatonim që nëse nga studimi i bërë në të gjithë Europën kishtë një shkallë relativisht të lartë sëmundshmërie dhe të ekzaminuarit ishin shumë pak. Ne kishim në Shqipëri një numër të ekzaminuarish pesë herë më të vogël se realiteti, dhe ndërkohë në Programin e Qeverisë, parandalimi dhe diagnostikimi i hershëm janë të vendosura si një nga prioritetet për të patur kujdes shëndetësor më të mirë.”

Këto pajisje mjekësore, tha më tej Ministri Beqaj, “përmirësojnë cilësinë e shërbimit ndaj pacientëve, sepse me këtë numër aparaturash, për herë të parë në këtë spital, kemi mundësinë t’i shërbejnë njëkohësisht si pacientit të hospitalizuar, edhe atij që vjen në ambulator, ashtu edhe urgjencave.” Shpeshherë, ky ekzaminim është përcaktues për vendosjen e diagnozës për të sëmurët me patologji të mushkërive, vazhdoi më tej ai, duke theksuar se “ndërkohë, për pacientët ambulatorë që vijnë nga rrethet, këto pajisje ndihmojnë edhe për realizimin e ekazminimit në një kohë tepër të shkurtër, duke ulur në minimum kohë-qëndrimin e tyre në spital.” Përveç këtyrë pajisjeve në të gjithë Shqipërinë do të instalohen gjithsej gjashtëdhjetë spirometra, edhe në spitale, por edhe në qendrat e kujdesit parësor. Dua të përfitoj nga rasti të falenderoj për ndihmën bujare kompaninë Berlin-Chemie, e cila kërkesës tonë për të ndihmuar kujdesin e sëmundjeve të mushkërive i’u përgjigj me këtë ndihmë me këto pajisje”, – tha ai.

Gjithashtu, këto spirometra të gjeneratës së tretë, ofrojnë mundësinë që ky ekzaminim të kryhet drejtpërdrejtë në shtrat të pacientit, një shërbim që realizohet për herë të parë në këtë institucion. Përsa i përket sigurisë së mbrojtjes nga infeksionet sipas standarteve botërore, krijohet mundësia që të kryhet në mënyrë të diferencuar ky ekzaminim për pacientët me imunodefiçencë, apo edhe me ata me sëmundje infektive, potencialisht të transmetueshme (viroza, infeksione, TBC). “Kjo rritje e cilësisë shoqërohet me përmirësimin e dy prej standarteve më të rëndësishme të shërbimit spitalor, që janë ulja e kohë-qëndrimit, si dhe ulja e kostos së shërbimit ndaj pacientëve”, tha Ministri Beqaj.

—###—