Beqaj: Prirja e përhapjes së gripit në rënie

Tiranë, 11/3/2014 – Ministri i Shëndetësisë, z. Ilir Beqaj, mori pjesë në mbledhjen e sotshme (11/3/2014) të Komisionit të Kuvendit për Punën, Çështjet Sociale dhe Shëndetësinë, në përgjigje të kërkesës së komisionit me rend dite: “Dhënie informacioni nga Ministri i Shëndetësisë për situatën epidemiologjike në vend”.

Duke shpjeguar ecurinë e rasteve të paraqitura me grip gjatë dy javëve të fundit, Ministri Beqaj theksoi se “aktiviteti sezonal i gripit është normal dhe tendenca është në rënie”, duke vënë në dukje se, “aktualisht, ka më pak raste të evidentuara me virusin e gripit, krahasuar me një vit më parë”.

Gjithashtu, në fjalën e tij, Ministri Beqaj foli edhe për disa ndryshime të parashikuara për stinën e ardhshme, që lidhen me mënyrën e funksionimit të parësorit, sidomos përsa i takon urgjencave pediatrike. “Do të arrijmë të kemi prezencë 24-orë në disa qendra shëndetësore ku ka popullësi të madhe” – tha ai. “Gjithashtu, një tjetër masë që do të ndërmarrim, është vaksinimi në shtatorin e ardhshëm, me vaksina parandaluese, i personelit shëndetësor”, – vazhdoi më tej Ministri.

Në vijim, fjala e plotë e Ministrit Beqaj në mbledhjen e komisionit.

—###—

Faleminderit për interesimin për këtë çështje të ndjeshme për popullatën.

Sot që ne flasim, aktiviteti sezonal i gripit është normal dhe tendenca është në rënie. Aktualisht, ka më pak raste të evidentuara me virusin e gripit, krahasuar me një vit më parë.

Do t’ju lutesha të mos e përdorni terminologjinë grip derri, pasi në fakt nuk është më kështu, por bëhet fjalë për virus human.

Ne kemi marrë një sërë masash për këtë situatë, duke filluar me ngritjen e komisionit ad-hoc, si dhe me nxjerrjen e dy urdhrave, si për masat në kujdesin shëndetësor parësor, ashtu edhe në atë spitalor.

Deri tani, sipas sistemit tonë të survejancës, janë analizuar 700 mostra, nga të cilat 124 kanë rezultuar positive me gripin e tipit A; 65 raste me A(H1N1) dhe 59 raste me A(H3). Sikurse jeni informuar, ka patur dy raste fatale; dy persona kane humbur jetën, por kanë patur probleme me insufiçencë dhe dëmtime të organeve të tjera.

Ne kemi furnizuar spitalet me Tamiflu si dhe kemi mundësuar mbrojtjen e personelit shëndetësor me maska specifike për gripin. Gjatë kësaj periudhe tre-javore, mbikqyrja ka funksionuar shumë mirë. Edhe reagimi i kujdesit parësor, ka qenë efiçent.

Por, parashikojmë disa ndryshime për stinën e ardhshme, që lidhen me mënyrën e funksionimit të parësorit, sidomos përsa i takon urgjencave pediatrike. Do të arrijmë të kemi prezencë 24-orë në disa qendra shëndetësore ku ka popullësi të madhe. Gjithashtu, një tjetër masë që do të ndërmarrim, është vaksinimi në shtatorin e ardhshëm, me vaksina parandaluese, i personelit shëndetësor.

— Pyetje nga deputetët —

– Fushata sensibilizuese kërë vit, nuk ka qenë e fortë si më parë, përsa i takon vaksinimit të popullatës. A ka funksionuar sistemi i referimit për këtë çështje?

– Lidhur me fëmijët autikë, kemi një shqetësim të një qytetareje, a kanë ndikim vaksinat në problemin e autizmit?

– Si është situate krahasuar me një vit më parë?

– A ka mundësi shteti të bëjë gjithë vaksinat e personelit mjekësor?

– A e mbulon dot buxheti i shtetit realizimin e disa qendrave shëndetësore me shërbim 24 orë?

— Përgjigjet e z. Ilir Beqaj —

Lidhur me fushatën sensibilizuese, mendoj se vlerësimi është shumë subjektiv. Sot, komunikimi është tejet i larmishëm dhe më i mirë se më parë. Ne kemi komunikuar intensivisht edhe nëpërmjet ISHP-së apo rrjeteve sociale, si dhe nëpërmjet faqes zyrtare të MSH.

Që në fillim të stinës, kemi nisur komunikimin me mjekët e Parësorit, madje duke shpërndarë edhe një manual nga OBSH-ja.

Dua të theksoj se, gjendja nuk është problematike, por bota e medias, është nekrofile. Nga dy raste fataliteti, janë raportuar katër. Në fakt, janë dy.

Lidhur me sistemin e referimit, vaksinimi, nuk është pjesë e këtij sistemi. Sa i takon vaksinimit dhe fëmijëve autikë, nuk ka një lidhje të tillë, megjithatë, po lë ekspertët të përgjigjen për këtë çështje:

Dr. Gazmend Bejtja, Drejtor i Drejtorisë së Kujdesit Shëndetësor në Ministrinë e Shëndetësisë: Nuk ka asnjë lidhje shkencore mes vaksinimit dhe problemeve të autizmit.

Dr. Arjan Bregu, Drejtor i ISHP-së: Vaksinimi është mjeti më I mirë mbrojtës për sëmundjet infektive dhe nuk kemi një bazë të dhënash shkencore që lidh vaksinat me autizmin.

Dr. Dhimitër Kraja, Shërbimi i Infektivitit në QSUT: Ka disa raste të tilla në botë por janë fare sporadike krahasuar me numrin e të vaksinuarve, çka nuk përbën një bazë shkencore për të lidhur efektet e vaksinave me sëmundjen e autizmit. Por, dua të theksoj se vaksina duhet bërë pas konsultës me mjekun.

— Vijon z. Beqaj —

Lidhur me krahasimin e rasteve me një vit më parë, aktualisht numri është më i ulët, por në një periudhë të kaluar – nga 25 shkurti më 5 mars, numri ka qenë rreth 5% më i lartë krahasuar me një vit më parë, ndërsa në periudhën aktuale, është rreth 3-4% më i ulët se një vit më parë.

Përsa i takon mbulimit të personelit mjekësor me vaksina, ne do të përpiqemi ta negociojmë drejtpërdrejt dhe kostoja është afërsisht 12 milion lekë. Mendoj se është e nevojshme, pasi përveçse mbrojmë personelin shëndetësor, nuk lejojmë përhapjen e viruseve në popullatë.

Lidhur me pyetjen e buxhetit për të patur personel shtesë për mbulimin 24-orë të disa qendrave shëndetësore, mendoj se kjo është e domosdoshme, por nuk mund të kemi një shtesë personeli për momentin, megjithatë, mund të gjendet një zgjidhje nëpërmjet mbulimit të shërbimit 24 orë nga një zë tjetër nga Ministria e Shëndetësisë.

Gjithashtu z. Beqaj deklaroi se ka një rikthim të disa sëmundjeve infektive të cilat ishin zhdukur prej vitesh, si pasojë e globalizimit dhe lëvizjes së lirë të njerëzve, ndaj ne po marrim masa që në QSUT të mos mungojnë barnat për sëmundjet e rralla infektive, pasi, edhe me riskun që barna të tilla nuk do të përdoren, apo do të përdoren pak, më mirë, të mos rrezikojmë përhapjen në masë të tyre në popullatë.

—###—