Koçiu drejtuesve të strukturave shëndetësore: Të nxitet ndërgjegjësimi për vaksinimin falas kundër gripit për grupet e riskut

Ministrja e Shëndetësisë dhe Mbrojtjes Sociale, Albana Koçiu zhvilloi sot një takim me drejtuesit e strukturave shëndetësore në vend ku diskutoi për situatën e gripit në vend, vijimin e vaksinimit falas kundër gripit për grupet e riskut, ndërgjegjësimin e qytetarëve në lidhje me parandalimin ndaj virozave të stinës, si dhe përforcimin e survejancës.

Ministrja Koçiu bëri të ditur se Instituti i Shëndetit Publik ka marrë të gjitha masat për të shpërndarë në qendrat shëndetësore 260 mijë doza vaksine gripi.

Ndërkohë, theksoi Koçiu, Operatori i Kujdesit Shëndetësor, së bashku me qendrat shëndetësore dhe mjekët e familjes janë siguruar për të nxitur dhe vaksinuar të gjithë grupet e riskuara

Ministrja Koçiu shtoi se janë 31 qendra shëndetësore të shpërndara në të gjithë vendin, të cilat ofrojnë shërbim 24 orë në këtë situatë virozash.

Ajo u shpreh se vetëm në Tiranë, janë 4 qendra shëndetësore që gjithashtu punojnë 24 orë dhe janë të hapura edhe si urgjenca pedriatike për më të vegjlit.

“Dua të theksoj edhe një herë rëndësinë e vaksinimit. Të gjitha grupet e riskuara duhet t’i drejtohen mjekut të familjes, fëmijët e vegjël, gratë shtatzëna apo të moshuarit dhe ata që vuajnë nga sëmundjet kronike duhet të kryejnë vaksinën e gripit”, deklaroi ministrja Koçiu.