Ministri Beqaj dhe Ambasadorët Schnöll e Bertoncelj përurojnë Repartin e Protezimit

Kukës, 18/03/2014 – Ministri i Shëndetësisë, z. Ilir Beqaj, i shoqëruar nga z. Thomas Schnöll, Ambasador i Austrisë në Shqipëri, dhe z. Bojan Bertoncelj, Ambasadori i Sllovenisë në Shqipëri morrën pjesë sot (18/03/2014) në ceremoninë e dorëzimit të materialeve të protezimit që shërbejnë për të siguruar pajisjen me proteza për të gjymtuarit nga minat dhe municionet e paplasura, si dhe personat e tjerë në nevojë në repartin e protezimit të Spitalit Rajonal të Kukësit.

Me pajisjet dhe materialet përbërëse për prodhimin dhe riparimin e protezave në Spitalin e Kukësit të siguruara nëpërmjet një donacioni të Qeverisë Austriake, në kuadrin e Programit Shqiptar të Veprimit ndaj Minave e Municioneve, do t’ju vihet në ndihmë afërsisht 150 personave me riparime të pjesshme ose proteza tërësisht të reja.

Duke falënderuar për ndihmën e pakursyer dhe mbështetjen e vazhdueshme të Qeverisë Austriake, Ministri Beqaj tha midis të tjerash në fjalën e vet për të pranishmit, se “ky është një projekt tjetër që i bashkëngjitet nismave për realizimin e synimit tonë primar për zgjatjen e viteve të shëndetshme të jetës së popullatës shqiptare dhe parandalimin e fataliteteve të parakohshme duke rivendosur, ruajtur dhe përmirësuar shëndetin.”

Në vijim, fjala e plotë e Ministrit Beqaj në ceremoninë e përurimit të repartit të protezimit dhe fizioterapisë në Spitalin Rajonal të Kukësit.

—###—

I nderuar z. Ambasador,

Të nderuar pjesëmarrës,

Jam i emocionuar që marr pjesë sot në ceremoninë e dorëzimit të materialeve të protezimit që shërbejnë për të siguruar pajisjen me proteza për të gjymtuarit nga minat dhe municionet e paplasura, si dhe personat e tjerë në nevojë, këtu në repartin e protezimit të Spitalit Rajonal të Kukësit.

Siç e dimë, në vitin 1999, si rezultat i krizës humanitare në Kosovë, vlerësohet se në Kukës mbërritën më tepër se 500,000 kosovarë, dhe Spitali i Kukësit ka qenë pika e parë e referimit dhe e dhënies së ndihmës së parë mjekësore, si dhe e ndërhyrjeve të shumta kirurgjikale për të gjithë personat në nevojë në atë kohë tepër të vështirë. Po ashtu, si pasojë e minave të vendosura në verilindje të Shqipërisë nga forcat e ushtrisë serbe gjatë krizës së Kosovës në vitet 1998-1999, 39 fshatra u kontaminuan me mina dhe municione të paplasura në zonën kufitare Shqiperi–Kosovë.

Prandaj, në këtë këndvështrim, Programi Shqiptar i Veprimit ndaj Minave e Municioneve, me ndihmën edhe të Ministrisë së Shëndetësisë, si dhe kontributin e vyer të partnerëve tanë, ka luajtur një rol të veçantë në përmirësimin e shërbimeve mjekësore për të dëmtuarit e minave e municioneve si dhe personave të tjerë me aftësi të kufizuar në Shqipëri.

Një falënderim i veçantë shkon për ndihmën e pakursyer dhe mbështetjen e vazhdueshme, edhe në këtë rast, të Qeverisë Austriake, të përfaqësuar sot në këtë ceremoni nga Sh.T.Z. Ambasadori Thomas Schnöll, e cila mundësoi nëpërmjet një donacioni blerjen e këtyre pajisjeve të protezimit, që daton qysh në shtator të vitit 2013.

Me pajisjet dhe materialet përbërëse për prodhimin dhe riparimin e protezave në Spitalin e Kukësit, që u mundësuar nëpërmjet këtij donacioni, do t’ju vihet në ndihmë afërsisht 150 personave me riparime të pjesshme ose proteza tërësisht të reja. Ky është një projekt tjetër që i bashkëngjitet nismave për realizimin e synimit tonë primar për zgjatjen e viteve të shëndetshme të jetës së popullatës shqiptare dhe parandalimin e fataliteteve të parakohshme duke rivendosur, ruajtur dhe përmirësuar shëndetin.

Gjithashtu, dëshiroj të falënderoj për punën e palodhur dhe përkushtimin Zyrësn Shqiptare të Koordinimit të Minave dhe Municioneve (AMMCO) dhe Fondin Ndërkombëtar të Besimit Slloveni (International Trust Fund Slovenia – ITF), të cilët kanë mbështetur në mënyrë të vazhdueshme procesin e përmirësimit të kapaciteteve të rehabilitimit fizik e mjekësor në spitalin e Kukësit, nëpërmjet furnizimit me materiale të nevojshme për prodhimin e protezave për të dëmtuarit me mina e municione dhe trajnimeve të stafit mjekësor e ndërtimit të kapaciteteve të rehabilitimit në Shqipëri, dhe posaçërisht, blerjen e materialeve të protezimit për repartin e protezimit në Spitalin e Kukësit.

Në kuadrin e bashkëpunimit me programin e minave, për përmirësimin e kapaciteve shëndetësore spitalore, si dhe atë të shërbimit parësor në rrethet Kukës, Has e Tropojë:

• janë trajnuar në Spitalin Universitar të Mariborit, Slloveni, tre mjekë në kuadër të përmirësimit të kapaciteteve mjekësore për traumat dhe urgjencat mjekësore;
• janë zhvilluar cikle të plota trajnimi për përmirësimin e kapaciteteve të ndihmës së parë dhe fizioterapisë, si dhe kujdesit ndaj protezës e higjenës së saj të personelit mjekësor për 30 fshatra të ish-kontaminuara me mina e municione;
• janë furnizuar me pajisje të domosdoshme 30 qendrat ambulatore mjekësore të 30 fshatrave të ish-kontaminuara me mina dhe municione të paplasura;
• është furnizuar Spitali i Kukësit me pajisje për aparatin e radiografisë, aparatin e sallës kirurgjikale, si dhe atë të grafisë/skopisë televizive.

Përsa i përket ngritjes së repartit të protezimit dhe fizioterapisë pranë Spitalit të Kukësit:

• janë zhvilluar ciklet e plota të trajnimit të teknikut të protezimit për një periudhë 3-vjeçare, si dhe trajnime për personelin e fizioterapisë dhe mjekët e tjerë;
• është kryer furnizimi me pajisje e makineri për riparimin dhe prodhimin e protezave – që nga viti 2007 prodhohen proteza të gjymtyrëve të poshtme pranë Spitalit të Kukësit, jo vetëm për të dëmtuarit nga minat dhe municionet, por për të gjithë personat në nevojë nga e gjithë Shqipëria;
• është realizuar furnizimi me lëndë të parë, materiale e pajisje për riparimin dhe prodhimin e protezave.

Ka edhe një masterplan për rehabilitimin e Spitalit të Kukësit, i cili synon ofrimin e shërbimeve të një niveli më të lartë ndaj personave në nevojë, duke e vënë edhe më tepër theksin në përmirësimin e kapaciteteve të urgjencës dhe atyre kirurgjikale.

Ashtu siç jemi angazhuar edhe në programin tonë qeverisës, projekte të tilla, kontribuojnë në përmirësimin e shërbimeve mjekësore, jo vetëm për të dëmtuarit nga minat e municionet, por edhe për të gjithë personat e tjerë në nevojë dhe ata me aftësi të kufizuara në Shqipëri, si dhe i krijojnë profesionistëve kushtet e nevojshme për të shërbyer me cilësi në shërbimin e kujdesit shëndetësor në vend.

Ju faleminderit!

—###—