Ministri Beqaj: Mamografë të lëvizshëm për rritjen e aksesit të grave në moshë risku

Ministri Beqaj: Mamografë të lëvizshëm për rritjen e aksesit të grave në moshë risku

Tiranë, 03/02/2014 – Deputetët e mazhorancës dhe opozitës në Komisionin e Punës, Çështjeve Sociale dhe Shëndetësisë, miratuan në unanimitet të hënën (03/02/2014) ratifikimin e marrëveshjes për eksport, ndërmjet Këshillit të Ministrave të Republikës së Shqipërisë dhe Qeverisë Austriake, për financimin e projektit mbarëkombëtar të radioterapisë.

Në fjalën e tij, ministri i Shëndetësisë, z. Ilir Beqaj, u shpreh se, përmirësimi i pajisjes së spitaleve tona me aparatura moderne për diagnostikimin dhe trajtimin e kancerit, është domosdoshmëri. Në vendin tonë po shihet një rritje reale, mjaft e shpejtë e kësaj patologjie, me rreth 50% në 15 vitet e fundit dhe e pasuar edhe me rritje të vdekshmërisë. Në Shqipëri, shërbimi i Onkologjisë, mbetet i vetmi shërbim ku kryhet një trajtim multidisiplinar, pra ku kombinohen çdo ditë në të njëjtin “auditor” kirurgjia, kimioterapia dhe radioterapia. Kirurgjia ka një aktivitet prej 1600 operacionesh në vit, ndërsa radioterapia shërben për rreth 1000-1200 të sëmurë në vit.

“Por, aparaturat aktuale, nuk mbulojnë dot kërkesat në rritje për këtë shërbim. Ndërkohë që aparatura e kobaltit që përdoret sot, përpos efektit mjekues, dëmton edhe qelizat e shëndosha rreth zonës tumorale, ndaj sot, kudo në vendet përreth, aplikohet rrezatimi me akserelator linear. Nëpërmjekt këtij projekti, do të përfitohet akserelatori, shoqëruar me CT-skaner me lazer, injator kontrasti si dhe dy printera”, tha ministri i Shëndetësisë.

Gjithashtu, z. Beqaj e vuri theksin gjatë fjalës së tij, edhe te sigurimi i dy mamografëve të lëvizshëm, me synim parandalimin e kancerit të gjirit. “Vetëm gjatë muajit të sensibilizimit për parandalimin e kancerit të gjirit, vumë re një dyfishim të ekzaminimeve, ndaj mendojmë se me këto mamografë mobilë, do të rrisim aksesin e grave në moshë risku, sidomos në zonat rurale”.

Janë bërë investime nga Qeveria e kaluar për aparatura, -tha z. Beqaj- por duhet të pranojmë se, shkalla e përdorimit të tyre, është mjaft e ulët.

Lidhur me interesimin e deputetëve për programin e depistimit, trajnimin e personelit për aparaturat e reja si dhe për mbulimin me shërbim të specializuar, z. Beqaj u përgjigj: “Padyshim që në programin e Qeverisë sonë, Shëndetësia është një angazhim madhor. Dy nga grupet kryesore ku ne po fokusohemi –edhe për shkak të incidencës dhe fatalitetit të lartë- janë sëmundjet kardiovaskulare dhe ato tumorale. Ne synojmë parandalimin e hershëm të sëmundjeve nëpërmjet programit të depistimit që do të ndërmarrim për grupmoshën 40-65 vjeç, ndërsa për grupe të caktuara, do të parashikojmë protokolle mjekimi më specifike, si p.sh., për gratë që jetojnë me ndihmë ekonomike etj., për të ulur pragun e grupmoshës depistuese. Gjithashtu, dy aparaturat e lëvizshme që përmenda më sipër, do të prekin dhe zonat rurale, ku aksesi në shërbimet shëndetësore, është më i ulët.

Lidhur me trajnimin e personelit shëndetësor për aparaturat e reja, Agjensia Bërthamore në Vjenë, është e gatshme, që tani, për të kualifikuar specialistët fizikantë që do të përdorin këto aparatura. Gjithashtu vlen për t’u theksuar edhe mirëmbajtja e tyre, si një komponent shumë i rëndësishëm. Ne duam që këtë vit, të kalojmë në kontrata të tipit ‘full-risk’, ndërsa vitin tjetër, mirëmbajtja e aparaturave, do të mbulohet nga Agjencia e Pajisjeve Biomjekësore.

Lidhur me mbulimin më të mirë të shërbimit, së shpejti do të kemi edhe 14 mjekë onkologë që pritet të mbarojnë specializimin këtë vit dhe ato do të vendosen edhe në qendra të tjera, jo vetëm në Shërbimin Onkologjik.

Sa i takon gjendjes si e gjeti Qeveria e re shërbimin shëndetësor, z. Beqaj i’u përgjigj deklaratave të deputetëve duke u shprehur se: “Asnjë prej skanerave nuk punonte, situata me furnizimin me barna ishte në gjendje skandaloze dhe ne, vetëm brenda 100 ditëve të para, siguruam rivënien në punë të të gjithë skanerave si në Spitalin e Traumës, QSUT-së dhe në rrethe, si dhe vetëm për Spitalin e Traumës, u kompletua dhe u vu në punë laboratori,  u bë i mundur furnizimi me barna, si dhe në buxhetin e këtij viti, kemi parashikuar blerjen e një skaneri të ri për këtë spital, për shkak të ngarkesës së madhe që ai ka. Gjithashtu, – tha ministri i Shëndetësisë, – do të aktivizojmë kredinë italiane për këtë spital prej 5 milion euro, e cila flinte në sirtarë që prej vitit 2006.

“Ne do të realizojmë gjithashtu, rinovimin e seteve dhe instrumentave kirurgjikale –dhe kushdo nga ju që është mjek kirurg e di shumë mirë në çfarë gjendje janë-duke kërkuar garanci sterilizimi, në mënyrë që të ulim ndjeshëm infeksionet spitalore”, tha z. Beqaj.

Ministri i Shëndetësisë e mbylli fjalën e tij, duke deklaruar se, kjo është një kredi, që sigurisht paguhet nga taksapaguesit shqiptarë, por ne nuk do të lejojmë më që të ndodhë si deri më sot, ku janë të paktën 3.2 milion dollarë pajisje që rrinë stok në QSUT dhe spitalin “Shefqet Ndroqi”, por ne do t’i vëmë ato në punë, në funksion të një shërbimi më të mirë për popullatën”

Financimi për këtë projekt, do të jepet nga qeveria Austriake, përmes Unicredit Bank Austria dhe kap vlerën 2 milion euro.

—###—