Ministri Beqaj përuron Laboratorin e ri Anatomo-Patologjik në Durrës

Ministri Beqaj përuron Laboratorin e Ri në Durrës: “Më shumë siguri dhe progres për pacientët shqiptarë”

Durrës, 10/06/2014 – Ministri i Shëndetësisë, z. Ilir Beqaj, vizitoi sot (10/06/2014) Spitalin Rajonal të Durrësit me rastin e përurimit të Laboratorit të ri Anatomo-Patologjik, në të cilin morrën pjesë edhe z. Vangjus Dako, Kryetar i Bashkisë së Durrësit, drejtues dhe punonjës të këtij institucioni, si dhe Vullnetarët e Korpusit Amerikan të Paqes për Kujdesin Shëndetësor, z. Paul Oupadia, Kardiolog, dhe znj. Susan Oupadia, Patologe, që të dy, mjekë me një përvojë gati 30-vjeçare, të cilët kanë shërbyer në Shqipëri si konsulentë mjekësorë dhe edukatorë të shëndetit, në kuadrin e Programit të Promovimit dhe Edukimit Shëndetësor në rrethe të ndryshme të Shqipërisë prej më se një viti.

Në fjalën e tij në takim, Ministri Beqaj shprehu falënderimin dhe mirënjohjen e Ministrisë së Shëndetësisë për përkushtimin dhe punën e madhe që është bërë nga Vullnetarët e Korpusit të Paqes për më tepër se dhjetë vjet në të gjithë vendin, kur qysh nga Marsi i vitit 2004 numërohen 124 vullnetarë të kujdesit shëndetësor që kanë ushtruar veprën e tyre në Shqipëri. Aktualisht, në Shqipëri veprojnë 27 vullnetarë të shëndetit, të cilët shërbejnë në sektorin e Edukim-Promocionit shëndetësor.

Në ceremoninë e organizuar me këtë rast, mjekët vullnetarë të Korpusit të Paqes u nderuan me një çertifikatë mirënjohjeje për shërbimin dhe punën e kryer në vendin tonë nga Drejtorja e Spitalit Rajonal të Durrësit, znj. Ardiola Frashëri.

Gjithashtu, përveç risive dhe përvojës së re në praktikën e menaxhimit të laboratorëve të sjellë nga Vullnetarët, në aktivitet u promovua edhe pajisja e furnizimi me pajisje dhe reagentë i laboratorit biokimiko-klinik nëpërmjet një programi projekti bashkëpunimi të Drejtorisë së Spitalit Rajonal të Durrësit dhe sipërmarrjes vendore, të cilat do të ndihmojnë në realizimin për herë të parë të analizave hormonale në këtë spital, duke i paraprirë kështu, angazhimit tjetër të ministrisë për lançimin e projektit të Kemioterapisë, përveç QSUT-së, edhe në Durrës.

Pajisjet dhe reagentët e siguruara nëpërmjet këtij sponsorizimi, përfshijnë: Cell-counter – 2 copë; Fotometer – 2 copë; Centrifugë – 1 copë, 25,000 analiza hematologjike.

Hapi tjetër do të jetë sigurimi i një Autoanalizatori Biokimik. Gjithashtu, për të punuar me Autoanalizator Hormonal (në përdorim të Spitalit), janë siguruar furnizime me kite për analiza hormonale: Tiroide: TSH, FT4, FT3; Ferritina; dhe Analiza CA125 dhe CA15-3 për diagnostikimin e rasteve të kancerit të gjirit dhe vezoreve; si dhe analiza për urgjencën: Troponina dhe Ddimer – kryesisht për Urgjencën dhe repartet e tjera: Kardiologji dhe Patologji.

Në vijim fjala e plotë e Ministrit Beqaj në këtë aktivitet.

—###—

Mirë se ju gjeta,

Faleminderit për aktivitetin,

Falënderim për kryetarin e bashkisë që është sot këtu me ne,

Falënderim për mjekët e “Korpusit të Paqes”,

Falënderim për sponsorët e tjerë, sipërmarrjet private që e bënë të mundur atë çfarë po ofrojmë sot, si një shërbim të rikthyer në domosdoshmëri në Spitalin Rajonal të Durrësit.

Ne, në fakt, po vijmë praktikisht në përmbylljen e pjesës së parë të qeverisjes, që është pjesa e 300 ditëve dhe besoj, se sot që po flasim, unë mund të them si Ministër, ato çfarë ishin angazhimet tona të pjesës së parë, besoj se i kemi vënë në vijë. Që do të thotë se kemi hyrë në një cikël të furnizimit normal dhe të vijueshëm me barna; pothuajse, kontratat kryesore janë lidhur; ato dy-tre të fundit mbyllen gjatë kësaj jave. Që do të thotë, barnat kryesore: antibiotikët, serumet, oksigjeni, këto që janë shqetësimet kryesore, tek ju bëhen dhe më të ndjeshme për specifikën e sezonit turistik në Durrës, besoj se i kemi vënë në lëvizje.

Në Durrës kemi arritur të plotësojmë me pak shtrëngesa një funksionim më të mirë të pajisjeve biomjekësore, ndërkohë që në fillim të Korrikut hyjmë në kontrata të tipit “full-risk” për të gjithë biomedikalin në spitalet universitare dhe ato rajonale të Shqipërisë.

Por, besoj se edhe përmirësimi i shërbimit laboratorik është një gjë që ju kthen ju në parametra normalë. Ju kthen në parametra normalë, sepse duke filluar nga një diagnozë e saktë, e para, ofrojmë më shumë siguri në vendimmarrje në atë çfarë marrim për të trajtuar pacientin. Unë besoj se, dhe ju vetë, jeni më të sigurtë në ushtrimin e detyrës dhe misionit tuaj.

Kështu që, sigurisht pastaj duhet të hyjë në një fazë më të plotë zbatimi të asaj çfarë kemi marrë përsipër në programin e qeverisë dhe, unë besoj, se sigurisht, brenda korrikut, ne do arrijmë të kalojmë disa ligje të rëndësishme në Parlament, që janë: Ligji për barnat dhe pajisjet mjekësore, dhe po rishikojmë edhe njëherë në mënyrë të plotë: Ligjet e urdhërave të profesionistëve. Ju nuk ndikohemi shumë, por bëjmë një harmonizim midis urdhërave. Por, unë po e shfrytëzoj këtë rast për të diskutuar edhe për tre momente të tjera kryesore:

E para, është çështja e shërbimit ndaj qytetarit. Në statistikat që paraqiti drejtoresha, u pa që ka rritje të volumit të punës që është bërë nga ky spital. Nga diskutimet, të njëjtat shifra janë edhe nga Spitali i Traumës dhe Spitali Universitar “Nënë Tereza”.  Pra, ka një rritje të volumit të punës këto 5 muaj, krahasuar me 5 muajt e vitit të mëparshëm.

Unë jam ende në dilemë nëse ky është vetëm lajm i mirë, apo është lajm problematik. Për ju vetë, sigurisht që është një lajm i mirë, (pasi) keni ofruar më shumë shërbime. Por, duke qenë se bashkërisht do të duhet të punojmë në një mjedis, në një sektor që perceptohet nga qytetari shqiptar si më i korruptuari në Shqipëri, unë kam drojën se ky 20% apo 15% më shumë njerëz, është rritur 15 apo 20% në më shumë familje perceptimi i korrupsionit.

Sepse, në qoftë se të gjithë ankohen se sa herë shkojnë në spital duhet të paguajnë, këtu kanë ardhur 20% më shumë, në QSUT 15% më shumë, në Spitalin e Traumës janë 20% më shumë, unë kam ende pikëpyetje nëse vazhdon të jetë po ai perceptim që e shoqëron shëndetësinë shqiptare bashkë me drejtësinë. Janë dy sektorët që perceptohen si dy më të korruptuarit në Shqipëri këto 20 vjet. Dhe sigurisht, unë si Ministër, si anëtar i kabinetit, kam edhe këtë përgjegjësi.

Pra, sidomos në shëndetësi, kemi një përgjegjësi shumë më të madhe: Të përmirësojmë radikalisht kujdesin shëndetësor, për të shkuar te Mbulimi Universal, me akses të plotë për çdo shqiptar rezident, të financuar nga taksat. Por, edhe të rikthejmë besimin e qytetarëve shqiptarë tek shërbimet publike.

Besoj se pjesën kryesorë që më takon mua, apo drejtoreshës, – prandaj e thashë në parantezë, – e kemi vënë në vijë. Nuk do të ketë mungesë barnash, punon laboratori, pajisjet biomjekësore do t’i mirëmbajmë me kontrata “full-risk”. Kështu që mbetet shumë më tepër tani për t’u zhvilluar nga ju: puna e përditshme, kujdesi ndaj pacientëve, por, edhe perceptimi i gjithë qytetarëve.

Këtë do ta vendosim bashkarisht se si duhet ta zgjidhim: Me zbatim shumë më rigoroz të standarteve, të rregulloreve, të protokolleve. Aty ka më shumë përgjegjshmëri, përgjegjshmëri dhe transparencë, me këto mund ta zgjidhim. Dhe, duhet që, të vazhdohet me përpjekjet për të rritur cilësinë e shërbimit. Por, edhe për atë që ju vetë duhet të vazhdoni të mbaheni sa më të përditësuar në profesionin tuaj.

Unë i kam shifrat edhe specifike të Spitalit të Durrësit, nuk është momenti sot për t’i ndarë me ju dhe publikun, por përgjithësisht, në të gjithë shëndetësinë tonë, jemi jashtëzakonisht keq me standartet dhe kriteret e edukimit të vazhdueshëm. Nëse vazhdon kjo tendencë e 3-4 viteve, po të jemi rigorozë në ato standarte, të cilat nuk janë shumë agresive, në 1 Janar 2015, 40% e mjekëve nuk duhet të lejohen të punojnë.

Sigurisht që, dikush mund të thotë, po spitalet s’do të mbyllen, por prapë kjo nuk është mënyrë zgjidhje e problemit. Në fillim të Korrikut ne do të bëjmë publike masat konkrete që kemi vendosur se si do ta përballojmë këtë situatë. Është në të gjithë vendin dhe ndihet më shumë tek ata mjekë që mendojnë se janë të vetëm në spitalet e tyre, mendojnë se ministria, qeveria, qendra e akreditimit, s’kanë zgjidhje tjetër, por do të detyrohen të punojnë me ata, se s’kanë çfarë bëjnë.

Është një çështje që duhet administruar ndryshe dhe unë besoj se, edhe pse koha mund të mos jetë e mjaftueshme deri në fund të vitit për të rekuperuar boshllëqet e katër viteve, ka gjëra që mund të bëhen edhe duke kthyer në një gjë më normale, gjërat që ju i bëni përditë. Por, duhet pak më shumë vëmendje, që edhe ato aktivitetet e përditshme që i keni, qoftë t’i regjistroni, t’i akreditoni në QKEV dhe pastaj të kthehen, sepse ju e bëni këtë gjë. Duhet më shumë angazhim për ta formalizuar këtë gjë.

Dhe gjëja e fundit që doja të ndaja me ju, dua t’ju kërkoj që të rrisni angazhimin në këtë periudhë që afrohet sezoni turistik. Ne do të punojmë, përveç mënyrave tradicionale si deri tani, edhe duke ofruar një mbështetje shtesë të përkohshme, edhe shumë më tepër pranë zonave ku rrinë pushuesit, në mënyrë që të mos krijojmë bosllëqe në misionin normal që ju duhet të keni.

Është kjo specifikë në Durrës dhe në një pjesë të zonave turistike, ne po ngremë një sistem të përkohshëm këtë vit në fakt, dhe pastaj vitin tjetër, gjithë kjo pjesë do të realizohet nga Shërbimi Kombëtar i Urgjencës.

Javën e ardhshme ngremë njësinë e parë pranë Spitalit të Traumës, e cila do të fillojë të merret me konceptimin e Shërbimit Kombëtar të Urgjencës. Por, këtë vit të parë, do ta zgjidhim në mënyrë provizore, unë kam folur edhe me kryetarin e bashkisë që të paktën të kemi një njësi shtesë prezence 24-orëshe dhe vetë në plazh për të ofruar kujdesin më të parë, dhe për t’i ofruar më shumë siguri, qoftë atyre që vijnë, por edhe atyre që investojnë në këto biznese. Edhe ato e kanë pjesë të investimit të paketës që ofrojnë, edhe pse ky është një detyrim dhe shërbim publik që kemi. Unë besoj se, mundësitë janë.

Nisur nga ajo çfarë ky spital ka, në rradhë të parë si njerëz dhe eksperiencë profesionale, si infrastrukturë, por edhe si mjete që midis spitaleve rajonale të Shqipërisë të ketë parametra të mirë. Ajo çfarë ne na mungon deri më sot në vlerësimin e punës së spitaleve, është edhe vlerësimi i qytetarit dhe pacientit. Janë elementë që do të duhet t’i zhvillojmë.

Pasi kaluam këtë fazën e parë që ishte një periudhë relativisht më emergjente, do të duhet t’i zhvillojmë dhe t’i bëjmë vlerësimin dhe t’i japim hakun kujtdo edhe me këto parametra, që janë parametra sigurisht më të rinj, por që rezultojnë se janë të suksesshëm.

Ka përfunduar një projekt i USAID-it para pak javësh, që ka punuar me tre spitale, ku rezulton që aty ku është përdorur, në Lezhë, në njërin nga maternitetet edhe në Korçë, janë elementë që edhe pse për ne shqiptarët duken si të çuditshme dhe si të parakohshme, janë elementë që funksionojnë dhe në shoqërinë tonë. Kështu që, faleminderi për vemendjen, për faktin që u shkëputët. Megjithatë, unë harrova t’i them kujtdo që, që secili prej jush e ndjen se duhet të largohet, se megjithëse jemi ne këtu, pacientët janë më të rëndësishëm se sa ne që bëjmë këtë takim.

Faleminderit!

—###—