Projekte konkrete për përmirësimin e urgjencës me ndihmën bujare të partnerit tonë Turqisë

Projekte konkrete për përmirësimin e shërbimit të urgjencës me ndihmën bujare të partnerit tonë Turqisë
Beqaj: “Trainimi i 15 mjekëve të urgjencës shembull i shkëlqyer i bashkëpunimit”

Tiranë, 5/2/2014 – Ministri i Shëndetësisë, z. Ilir Beqaj, Z/Ministri i Shëndetësisë, z. Klodian Rjepaj dhe  Ambasadori i Republikës së Turqisë në Shqipëri, z. Hidajet Bajraktar mori pjesë sot në ceremoninë e organizuar me rastin e diplomimit të një ekipi prej 15 mjekësh shqiptarë të urgjencës në mbyllje të një kursi trajnimi në kuadrin e “Projektit të trajnimit të urgjencës në vendet ballkanike”, i mbështetur financiarisht dhe logjistikisht nga Ministria e Shëndetësisë e Turqisë.

Kursi, i cili u fokusua në “Çështje të Shërbimit të urgjencës dhe të fatkeqësive Natyrore”, u zhvillua në “Qendrën Ndërkombëtare të Trajnimit dhe Simulimit” në Urla, Izmir, në Republikën e Turqisë, në përiudhën dy-javore 20 Janar – 1 Shkurt 2014. Në përfundim të kursit u lëshua në çertifikatë nga autoritetet trajnuese të Republikës së Turqisë.

“Ky trajnim është pjesë e një proçesi në vazhdimësi dhe nuk është një rast i veçuar, apo sporadik, dhe si i tillë është një shembull i shkëlqyer i bashkëpunimit ndërmjet Ministrisë së Shëndetësisë, Ambasadës së Republikës së Turqisë në vendin tonë dhe Ministrisë së Shëndetësisë së Republikës së Turqisë,” tha midis të tjerash Ministri Beqaj.

Ndërkohë, Ambasadori Turk, z. Bajraktar, theksoi se “ne jemi të vendosur që të vazhdojme bashkëpunimin tonë me Shqipërinë në fushën e shëndetësisë për të bërë më të njohur përvojën tonë dhe eksperiencën.” Në kuadrin e bashkëpunimeve në fushën e shëndetësisë, Ambasadori tha se këto ditë ndodhen në Shqipëri dy përfaqësuesit e shëndetësisë së Edernesë për disa vizita studimore në Shqipëri me qëllim krijimin e një urë lidhje midis spitaleve të ndryshme të Shqipërisë dhe atyre të Edernesë. Në të në njëjtën kohë, bashkëpunim të mirë kemi edhe nëpërmjet Agjensisë së Koordinimeve e Bashkëpunimeve të Ndihmave Turke e quajtur TIKA. Në fushën e shëndetësisë ajo ka hapur Qendrën e Dializës, Bankën e Gjakut, ka kontribuar shumë në maternitete, në qendrën e okulistikës në poliambulancën e Tiranës dhe të tjera. TIKA do ta vazhdojë bashkëpunimin dhe po përgatisim edhe projekte të tjera, tha Ambasadori Bajraktar.

Nё ceremoni do të marrin pjesë Ministri i Shëndetësisë, z. Ilir Beqaj; Ambasadori i Republikës së Turqisë në Shqipërë, z. Hidajet Bajraktar; dhe përfaqësues të ekipit të mjekëve shqiptarë të urgjencës, si dhe përfaqësues të ekipit shëndetësor turk të Edernesë.

Nё vijim, fjala e plotё e Ministrit tё Shёndetёsisё, z. Ilir Beqaj, Ambasadorit të Republikës së Turqisë në Shqipëri, z. Hidajet Bajraktar, Z/Ministri i Shëndetësisë, z. Klodian Rjepaj, dhe pjesëmarrësve të tjerë në ceremoninë e takimit.

—###—

Ministri i Shëndetësisë, z. Ilir Beqaj: Ngritja e Shërbimit Kombëtar të Urgjencës është një prioritet i programit të Qeverisë, është një nga zotimet kryesore që ne kemi marrë në fushën e shëndetësisë. Brenda këtij viti do të vijojmë edhe me dy grupe të tjera: do të jetë një grup i dytë prej 30 mjekësh, pastaj do të jetë dhe një grup i tretë prej 15 mjekësh, vetëm në zbatim të këtij programi. Është një dëshmi edhe e një bashkëpunimi të shkëlqyer që Ministria jonë e Shëndetësisë ka me Ministrinë e Shëndetësisë së Turqisë.

Ky aktivitet që bëjmë sot, që është në fakt, pak ditë pasi mjekët erdhën nga kualifikimi që bënë në Turqi, përkon me një vizitë që po bën në Ministrinë tonë por edhe në Shqipëri, në institucionet e shëndetësisë në Shqipëri, një ekip nga rajoni i Edernesë në Turqi. Po ravijizojmë fushat e bashkëpunimit edhe me Edernenë dhe, edhe me ta do të duam të fokusohemi tek Shërbimi i Urgjencës.

Turqia në 10 vitet e fundit ka bërë një përmirësim rrënjësor të gjithë Shërbimit të Kujdesit Shëndetësor duke patur arritje shumë të mira dhe në Shërbimin e Urgjencës. Edhe pse vendet tona janë të ndryshme për nga popullsia dhe territori, ka rajone të Turqisë që janë të përafërta me përmasat që ka Shqipëria, qoftë në kuptimin e popullsisë, qoftë në kuptimin e përmasave dhe të relievit. Sigurisht me rolin e Turqisë në fushën e shëndetësisë kemi edhe aspekte të tjera të bashkëpunimit.

Ambasadori i Republikës së Turqisë në Shqipëri, z. Hidajet Bajraktar: Ne jemi tepër të kënaqur që, me Shqipërinë, me të cilën kemi lidhje të vjetra historike dhe kulturore kemi një bashkëpunim të mirë në shumë fusha, përfshirë edhe fushën e shëndetësisë.

Kohët e fundit u realizua një bashkëpunim i ri në fushën e shëndetësisë midis të dy vendeve, ku një grup i mjekëve shqiptarë mori pjesë në një program për ndihmën e shpejtë dhe rastet e urgjencës, projekt në Izmir, projekt që është iniciuar nga Ministri i Shëndetësisë i Turqisë, z. Mehmet Müezzinoğlu.

Ashtu siç e theksoi edhe z. Ministër, 15 mjekë të përzgjedhur nga Shqipëria ndoqën këtë trajnim për një periudhë nga data 20 deri më 31 Janar. Gjatë këtij trajnimi mjekëve shqiptarë i’u prezantua moduli i ndihmës së shpejtë, i cili zbatohet në të gjitha spitalet e Turqisë. Dhe ky kurs u realizua në gjuhën shqipe dhe angleze në përputhje me të gjitha standartet ndërkombëtare, dhe u realizua nga specialistët më të mirë turq të kësaj fushe.

Gjatë programit u bënë aplikime se si funksionon sistemi i ambulancave në tokë dhe në ajër, në të njëjtën kohë u bënë trajnime për ndihmën e shpejtë, për ndihmën e parë dhe çështje të tjera të rëndësishme. Por mjekët e nderuar shqiptarë nuk patën rastin vetëm të ndjekin këtë trajnim. Ata duke përfituar nga mikpritja turke patën rastin të vizitojnë qendra të rëndësishme historike si Efesi dhe qendra të rëndësishme turistike. Unë mund t’ju them se nga informacioni që kemi marrë nga Drejtoria e Shëndetësisë së Izmirit, mjekët e nderuar shqiptarë kanë treguar përgatitje mjaft të lartë profesionale e kanë treguar në qëndrimin  e tyre gjithë atë miqësinë që ka midis popujve tanë duke mbajtur qëndrime mjaft të mira nga ana njerëzore, janë krijuar lidhje mjaft të mira.

Unë me këtë rast ju përgëzoj për çka keni bërë. Ne jemi të vendosur që të vazhdojme bashkëpunimin tonë me Shqipërinë në fushën e shëndetësisë për të bërë më të njohur përvojën tonë dhe eksperiencën. Prandaj, në kuadrin e bashkëpunimeve në fushën e shëndetësisë, këto ditë ndodhen në Shqipëri dy përfaqësuesit e shëndetësisë së Edernesë, i cili është qyteti më i afërt me rrugë tokësore me Shqipërinë. Ekipi i ardhur nga Ederneja, ka bërë dhe do të bëjë disa vizita studimore në Shqipëri për të krijuar një urë lidhje midis spitaleve të ndryshme të Shqipërisë dhe atyre të Edernesë.

Në të në njëjtën kohë, bashkëpunim të mirë kemi edhe nëpërmjet Agjensisë së Koordinimeve e Bashkëpunimeve të Ndihmave Turke e quajtur TIKA. Në fushën e shëndetësisë ajo ka hapur Qendrën e Dializës, Bankën e Gjakut, ka kontribuar shumë në maternitete, në qendrën e okulistikës në poliambulancën e Tiranës dhe të tjera. TIKA do ta vazhdojë bashkëpunimin dhe po përgatisim edhe projekte të tjera.

Faleminderit të gjithëve!

Znj. Anila Kristaqi: Së pari duam të falenderojmë Ministrinë Turke të Shëndetësisë, Ambasadorin turk në Shqipëri, ministrin tonë, që realizuan pjesëmarrjen tonë në këtë trajnim. Nëpërmjet ambasadorit turk duam të falenderojmë doktor Turhanin, doktoreshën, Entelën – koordinatoren tonë – që kishin selektuar një program shumë efikas dhe shumë të vlefshëm për ne.

Interesi në këtë program ishte i të dy palëve. Interesi ynë ishte që të merrnim në maksimum atë ç’ka pamë atje, dhe interesi i palës turke ishte që na dhanë atë që kishin më të mirën në shërbimin e urgjencave të tyre. Të vlefshme për ne ishte informacioni që në momentin se si funksiononte skema e manaxhimit të sëmurëve në urgjencë, rastet praktike se si ndiqej një i sëmurë atje në urgjencë, që për të mos thënë pastaj inskenimet e skenave që për shumë nga ne ishin risi, raste fatkeqësish natyrore, që fatmirësisht tek ne nuk kanë ndonjëherë dhe që ne nuk kishim eksperiencë, por që i pamë ato sikur të ishin të vërteta.

Duke shpresuar që ky bashkëpunim të vazhdojë edhe më tutje, me grupe të tjera, me mjekë të tjerë, në mënyrë që shërbimi i urgjencave tek ne të implementohet një shërbim sa me efikas dhe sa më pranë të sëmurit.

Z/Ministri i Shëndetësisë, z. Klodian Rjepaj: Faleminderit z. Ministër që më dhatë mundësinë të flas për ato ç’ka kemi përgatitur deri më tani me grupin e punës për Sistemin e Urgjencave në Shqipëri, por  edhe me atë se ç’ka duam të arrijmë.

I nderuar z. Ambasador, jam i nderuar që flas në këtë aktivitet, që mund ta quajmë një aktivitet i vazhdimësisë së bashkëpunimit ndërmjet Ministrisë së Shëndetësisë dhe një shteti mik siç është Turqia, e cila ka pasur vazhdimisht nën vemendje dhe fokus ndihmën për sistemin shëndetësor, ju e përmendët në fjalën tuaj.

Natyrisht, aktiviteti i sotëm është një nga ato aktivitete që për ne, për sistemin shëndetësor në përgjithësi, dhe për ngritjen e Shërbimit Kombëtar të Urgjencës në veçanti është dhe do të jetë kryefjala e të gjitha aktiviteteve në këtë fushë. Trajnimi dhe edukimi i vazhdueshëm i të gjithë atyre që ofrojnë ndihmën e parë dhe që shpëtojnë jetë, do të jetë një nga pjesët më të rëndësishme të zhvillimit të sistemit të urgjencave mjekësorë në Shqipëri.

Çdo përpjekje e Ministrisë së Shëndetësisë dhe e gjithë sistemit shëndetësor për të reformuar Sistemin e Urgjencave Mjekësore në Shqipëri, në fund të fundit qëllimi final ka shpëtimin e jetëve, pra ka atë front ku ju që po trajnoheni dhe po punoni dhe ata që do të trajnohen, po punojnë, pra e sigurtë që çdo formë organizimi që do të marrë Sistemi i Urgjencave Mjekësorë në Shqipëri do të jetë në funksion të atyre që e ofrojnë Shërbimin e Urgjencave Mjekësore në Shqipëri.

Me të drejtë, në dokumentin strategjik që është zhvilluar për zhvillimin e Urgjencave Mjekësore në Shqipëri, trajnimi dhe edukimi në vazhdim përmendet si një nga pikat më të dobëta e cila kërkon një zhvillim të qëndrueshëm. Natyrisht grupi i punës po punon për të adresuar të gjitha pikat e dobëta që janë vërejtur në atë dokument strategjik dhe për ta çuar atë në një nivel më të lartë, pra në nivelin e zbatimit në terren, duke bërë një formë të re organizimi, pra duke standartizuar Shërbimet e Urgjencës, duke adresuar problemet që le të themi kanë të bëjnë me legjislacionin apo edhe probleme të tjera që kanë të bëjnë me zhvillimin e protokolleve apo edhe me sistemin e referimit në Urgjencat Mjekësore.

Mund t’ju them që në këtë vizion të Ministrisë së Shëndetësisë për një ndërhyrje shumëplanëshe në Sistemin e Urgjencave mund të përmend edhe zhvillimin e Qendrës Kombëtare të Traumës ku ministri e ka përmendur që do të ketë një ndihmesë shumë të madhe për ngritjen profesionale, për rritjen e cilësisë së punës në këtë qendër, por edhe për futjen e Shërbimit të Rehabilitimit, një koncept i munguar në mjekësinë shqiptare sot.

Natyrisht, në fokus të punës sonë është edhe komunikimi dhe transporti në Sistemin e Urgjencave Mjekësore, që janë elementë shumë të rëndësishëm me reformimin total të mënyrës së komunikimit ndërdisiplinor në fushën e Urgjencës Mjekësore, por edhe të transportimit të pacientëve, të personave në nevojë sa më shpejt pranë qendrave të specializuara. Për ta mbyllur, për t’i bërë të gjitha këto natyrisht na duhet mendja, natyrisht na duhet që ta kemi atë të zhdërvjellët dhe këtë e mban edukimi profesional i vazhdueshëm.

Por, shpresoj shumë që ky zhvillim të bëhët i qëndrueshëm dhe pse jo të kemi një Qendër tonën Kombëtare të Simulimit dhe Trajnimit, për ta përdorur në vazhdimësi për të trajnuar personelin tonë shëndetësor.

—###—